قصيدة نستنكر كل رموز الارهاب للشاعر جابر الكاظمي

كيف تفجر أضرحة الأطياب ............ نستكر كل رموز الأرهاب
هذا صوت يتجسد ............ صبراً يا آل محمد
نستكر كل رموز الإرهاب

بوفاتك ياعلي السجاد العالم ينحب باسره
مثل ما يطفح البركان جمر تتطافح العبرة
وننصب ماتم بكل عام دمعنا ونحيي هالذكرى
لچن يازينة العباد هالعام اختلف امره
گبر شبلك علي الهادي تهدم وانجهل قدره
مثل ماهدموا گبرك بسامرا انهدم گبره
كل منا يعلم ما الاسباب
حقد ماض يتجدد ............ صبرا ياال محمد

عليكم يابني الزهرة غربان المصيبة تحوم
مصابك ياعلي السجاد مصابين اصبحن هاليوم
رحت مسموم وبچبدك تگطع شفرة المحتوم
مثل حالك علي الهادي گضى بسم الغدر مسموم
گوم الهدموا گبرك نفس هالزمرة نفس الگوم
فجروا مرقد الهادي مثل گبرك صبح مهدوم
فانقلبوا في الذل على الاعقاب
والله عليهم يشهد ............ صبرا ياال محمد

صبركم يابني الزهرة فلا صابر بلغ حده
بين الگطعوا وريده وبين الوذروا جبده
الدهر ماخلى من عدكم حتى اليرضع بمهده
وانته ياعلي السجاد شفت چم لوعة چم شدة
شفت چم ظالم وملعون عليكم ظل يصب حقده
زمرة وما خلص منهم حتى النايم بلحده
كم من حق غادره السلاب
ان الارهاب تمرد ............ صبرا يا ال محمد

مرابعكم صفت بلقع وسنين العمر ظلمة
مصابك ياعلي السجاد جبل فوگ الگلب همه
الدهر باليكم باشرار لا رافة ولارحمة
يزيد بكل عصر موجود نفس جوره ونفس ظلمه
وشمر الگطع راس حسين وخضب شيبته بدمه
اجت من بعده احفاده لگبر العسكري تهدمه
تلك رؤوس الشر وذي الاذناب
هذا تاريخ اسود ............ صبرا يا ال محمد

الك يازينة العباد سؤال الوادم يوجهوه
ليش المرتضى جدك من دم طبرته يخضبوه
وليش الگطع راس حسين وجسمه بلا دفن خلوه
چبدك ليش يتگطع وگبرك سيدي يهدموه
خلي نگول ماضي وراح الحاضر خلهم يشوفوه
ليش لمرقد الهادي وابنه العسكري يفجروه
اين العالم عن تلك الانصاب
صرخة حق تتردد ............ صبرا يا ال محمد

زمرة تمردت من يوم ضلع الطاهرة المكسور
ومن ضربة ابن ملجم لحيدر من وگع مطبور
نفس هالزمرة هالاجلاد گطعوا بالطفوف نحور
عصابة كل زمن تظهر نفس الظلم نفس الجور
ذبحوا قتلوا وفجروا مراقد هدموا وكبور
لازم ينوضع من حد لكل ارهابي كل ماجور
اين العالم عن فعل الغصاب
درب للثار تعبد ............ صبرا يا ال محمد